كويرات ديال الكفتة ديال دجاج بمطيشة

المقــــــــــــادير :

نص كيلو كفتة ديال دجاج

 3 مطيشات كبار حمر

4 ثومات محكوكين

معلقة كبيرة ديال المعدنوس مقطع

معلقة كبيرة ديال مطيشة ديال الحك

الملح+ لبزار+اسكنجبير+ الملون+شوية ديال عطرية الكوري الهندية

زيت الزيتون

الطريـــــــــــــقة :

نغسل المطيشة و نقيها من القشرة ديالها و من الزريعة ديالها و نشلضها,نديرها فطجين ديال الطين أو فمقلا باش تطيب,نزيد عليها الثوم محكوكة و زيت الزيتون

ندير الملح+لبزار+اسكنجبير+ شوية ديال عطرية الكوري الهندية + و نخلط مزيان و نخلي مطيشة تطيب

ندير الملح+لبزار+اسكنجبير + شوية ديال عطرية الكوري الهندية +شوية ديال الثوم محكوكة فالكفتة ديال دجاج و نعجنها باش تدخل فيها العطرية و ندير منها كويرات متوسطين أو كبار حسب الذوق

منين تطيب مطيشة يمكن نزيد عليها ربع كاس ديال الما و نرمي فيها لكويرات ديال الكفتة يطيبو و نخوي فوق من الكفتة و مطيشة شوية دزيت الزيتون و نغطي الطاجين يطيب مدة 10 دقايق..

هشام اعبابو