share Tajincom

Bookmark and Share

Google+ Followers

samedi 6 février 2010

كفـــتـــة ديال السرديـــــــن بمطيشة

المقـــــــــادير

 
مقادير كفتة السردين

 
كيلو ديال السردين منفي و مغسول و مطحون

ستة ديال الثومات محكوكين

قبطة ديال القزبور و المعدنوس مقطعين

حفنة ديال لكرافس مقطع

الملح و لبزار,الكمون.التحميرة

كاس ديال لاشابلور أي الخبز محمر و مطحون

معلقة كبيرة ديال زيت الزيتون

قلب ديال حامضة مرقدة --- مشلظ ---



مقادير المرق

 
زوج مطيشات كبار منقيين و مشلضين أو محكوكين

زوج معالق كبار ديال مطيشة دلحك

ربعة ثومات محكوكين

ورقة سيدنا موسى

ربطة ديال المعدنوس و القزبور

فلفلة وحدة حارة --- إلى بغينا ---

الملح,لبزار,الكمون,اسكنجبير و الخرقوم أو الملون و التحميرة

معلقة كبيرة ديال زيت الزيتون
نص حامضة معصرة


 
الطريـــــــــــقة

 
ناخد السردين منقي و مغسول و نطحنو فطحانة أو خلاط كهرباءي,منين يتطحن نديرو فإناء كبير و نضيف عليه الملح و لبزار و الكمون و التحميرة و القزبور و المعدنوس و القلب مشلظ ديال حامصة مرقدة و معلقة ديال زيت الزيتون و نخلط كل شي مزيان + لاشابلور أي الخبز محمر و قاصح محكوك باش يجمع لنا الكفتة ديال السردين

نخلي الخليط مدة نص ساعة باش تدخل فيه العناصر مزيان

من مبعد ندير كواري و نخليهم فطبسيل

فطنجرة او طاجين ندير الزيت تسخن و ندير فيها الثومات محكوكين منين تتحمر الثوما نرمي المطيشة منقية و مشلضة تطيب و تتحمر نضيف القبطة ديال ربيع و رقة سيذنا موسى و التوابل كاملين و نحمر كل شي مزيان نزيد مطيشة ديال الحك و نحمرها مع الخليط ندير الفلفلة الحارة و نضيف على الخليط كاس كبير ديال الما و نخلي الطنجرة تغلي منين تغلي ندير لكواري ديال الكفتة دسردين و نسقيهم بالمرق اللي تطيبو فيه و نغطي الطنجرة و نخلي الكفتة تطيب

منين يطيب كل شي نعري على الطنجرة أو الطاجين و نخليه يتقلا إلى كان المرق ديالو كثير, نخوي عليه نص حامضة معصرة .




هشــــــام اعبـــــــــابو

2 commentaires:

colacaw a dit…

عندك الطياب غزال أخي هشام خسارة عامل الصور حجم صغير علاش الي كا تكبرهمشي

إلهام a dit…

تبارك الله عليك مدونة مغربية على حقها وطريقها

ilhamcuisine.over-blog.com

2 زوار طــــــاجينكم


web widgets